逆天奇案2︳69歲張雷爆肌再現TVB極震撼 日做2小時運動keep fit

《逆天奇案2》其中一個單元描述賊王石少波放監前一個月竟然選擇逃獄，被黃智賢等人大舉緝捕。飾演賊王嘅資深演員張雷，喺《逆天2》露上半身舉啞鈴又做掌上壓，睇落fit過唔少後生；劇中佢仲要逃避追捕，但似乎氣定神閒，原來平時有練開！

張雷對上一次現身TVB劇原來係17年前嘅《蕭十一郎》，佢話自己一向都有拍網劇同電影，今次拍《逆天2》係監製同編審搵佢。張雷聽完故仔覺得賊王一角有文戲同動作戲，啱晒自己，於是答應，仲賣口乖叫TVB多啲搵佢開工。

特技演員出身加上自幼習武，張雷話而家唔駛開工都會做運動，先跑幾公里然後再舉啞鈴、做掌上壓同Sit Up練體能，有時會打沙包、打拳、打功夫，加埋差唔多做2個鐘，而且張雷茹素多年，飲食清淡，難怪睇落唔似就快70歲！

張雷年青時投考動作演員訓練班而入行，後來更組成「神風特技隊」為多套港產片處理飛車場面。張雷同時成為正式演員，80年代拍過多套TVB劇，包括喺劉德華、陳玉蓮主演嘅《神雕俠侶》演金輪法王、《倚天屠龍記》飾演殷野王以及時裝劇《流氓大亨》演吳啟華大佬。

睇落硬淨嘅張雷原來係虔誠佛教徒，更拜師門下。而張雷喺2017年同拍拖39年嘅女友鄭淑儀正式簽紙結婚，張雷訪問時話結婚證書好過平安紙，有起咩事要處理就可以名正言順。張雷更曾經表示，希望太太可以「行先」，由佢處理身後事。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！