【幻滅咗大家嘅夢！】麥紫莉承認反口唔拍AV

今年20歲就擁有36G魔鬼身材、人稱「全港首位AV女優」嘅香港嫩模麥紫莉（Chili）由今年7月聲稱會去日本拍AV，原因係爸爸過世、媽媽又有腎臟病，所以要賺錢俾家人做醫藥費。佢個故事又爆又賺人熱淚，令Chili一夜爆紅。點知Chili今日喺Facebook話唔會拍AV，拍AV一事只係一個綽頭並向大家道歉。

當時Chili公司講到言之鑿鑿話佢已經籌備緊會去日本拍AV，仲話會搵埋著名AV男優合作，仲話唔排除會玩街頭真人騷，令到媒體爭相採訪。而Chili亦成功由一名寂寂無名嘅嫩模一夜上位，未脫就已經喺香港搵到唔少真銀。雖然當時消息傳出嘅時候就已經有台灣著名AV達人質疑話日本啲經理人話冇聽過會有香港女優出道。

近日已經有傳媒收到料話Chili間經理人公司原來未經註冊，而佢哋為咗捧佢上位就編咗呢個「賣身葬父」嘅故仔，可惜近排公司出現財困，Chili屢次被拖糧，終於決定同公司斬纜。去到今日，Chili喺Facebook留言話終於可以做返自己，拍AV只係公司諗出嚟嘅一個綽頭。自己終於可以理直氣壯同大家講唔會拍AV同埋向大家道歉。最後，Chili希望大家可以原諒佢。