【遊車河】揸車去林錦 搵真隱世森林Cafe

雜誌成日話要搵隱世餐廳，其實邊有咁多隱世吖，間間都係搭地鐵去到嘅，畀你班人揚開咗，個個蜂湧而至，仲有得隱世咩？嗱，要隱就隱到盡，喺大埔林錦公路就真係有間隱世餐廳喇，即使你揸車去到附近，唔留意睇都未必見到個入口。餐廳位於森林之中，所以叫自己做Forest Cafe，實在係非常之貼題嘅。

嗰度有咩好嘢食？有冇拉絲芝士？有冇正到大嗌嘅咖啡？呢間餐廳唔係sell呢啲嘢嘅，當然有撚手Mini burger配薯條，不過芝士拉絲就冇喇，芝士餅就有好幾款，再加杯香濃咖啡，簡簡單單，夠做。食物其實只係配菜，最重要係享受個恬靜環境，其實位置距離車路不遠，不過入到去就同外界隔絕咁，靜靜地喺度坐一個下晝，飲杯咖啡食件餅，或者聽下老闆啲珍藏黑膠唱片，唔惹蚊嘅可以坐户外木凳chok田原文青feel，好彩嘅話兩隻松鼠會走落嚟陪下你。怕蚊怕熱怕曬就坐番入室內，一樣充滿懷古味道。

再畀啲貼士你，如果真係想靜靜地過一個下晝，千祈唔好咁戇居到星期六、日或公眾假期去。有啲人硬係要假期入去，去到又嫌多人又嫌招呼唔周到，食唔到burger又喺個blog嘈，杯㗎啡濃啲淡啲又多多意見，然後就話去一次算永冇下次，呢啲咪港男港女心態囉，成世以為淨係服侍佢一個。

人哋開得喺偏遠地方，都係想低調啲靜靜哋畀大家一個另類選擇，你硬係要趁最繁忙嘅時間去，冇人幫到你喎。建議自己安排時間，餐廳就逢星期一休息嘅，你咪睇下邊日平日day off或者蛇王揸車入去慢慢歎囉，當全世界都返工受壓，你就蛇王坐喺度舒服地吹緊山風，沉澱思想諗下人生，嗰種感覺真係特別正，仲好過去旅行。

英式電話亭係影相位。

餐廳位於森林中間。

外面有一大片空地。

唔記得講點樣去添：如果由九龍揸車入去，出獅隧後向大埔方向行，沿住吐露港公路，經過科學園、過晒大埔市中心同大埔北出口，見到石崗嘅出口就靠左轉落去大迴旋處，再揀第一個出口左轉入林錦公路 （其實即係去大埔林村嘅方法），然後沿路可以收埋少少，留意下你嘅右手邊，會見到一個細到唔多起眼嘅牌仔寫住Forest Cafe，就喺呢度轉入去森林，記住要慢駛，跟指示喺空地泊車，小心唔好亂泊，因為阻到村民嘅話就……再提多次，盡量唔好揀繁忙時間去啦，歎咖啡唔同去茶樓，係要講Feel~~嘅，一陣去到搵唔到位泊車就冇Mood啦。

揸車入到林錦公路要留意呢個牌。

齋坐有啲悶？其實Café開12-6pm，如果全日Off，上半場可以去附近嘅嘉道理農場行下，要買飛入場，就當係行山做運動。嘉道理農場都算係香港人嘅集體回憶，本身就係一個科研場所，亦都係一個好靚嘅公園，一直都做好多本地動植物同生態研究，亦救過好多野生動物，有時間其實值得去睇吓，吸下新鮮空氣，人都醒神啲。

Mini Burger餐值得一試。

有咖啡點可以冇芝士餅。

怕蚊嘅可以坐室內。

好多寶麗萊收藏。

聽下老闆嘅經典黑膠。

亦有皮梳化雅座。

戶外吧枱就最好feel。

餐廳由松樹蔭遮蓋，好清涼。

單車都有餐廳字樣。

呢個係堅有人收信嘅郵筒嚟架。

四處角落都放咗蚊香。

好彩嘅話你會見到佢。